(أغنية عن النبع الذي يسهر)
حِنْ ..
وآنه حنْ
وانحَبِس وَنَّه ونمْتحِنْ
مَرخوص بَسْ كَة الدمع
شَرط الدَمع،
حدّه الجِفن
***
جفنَك،
جنِح فرّاشة غض
وحجارة جِفني ..
وما غُمَض.
يَلتمشي بيّه،
ويّه النبَض
روحي اعله روحَك تنسحِنْ
حِنّ بويه حِنّ
***
عيونَك،
زرازير البراري
بكل مَرحها
بكل نَشاط جناحها،
بْعالي السَحَر
والروح مِنّي،
عوسجَة بَر
ما وصَل ليها النده،
ولا جاسها بگطرة، المطر
وصفولي عَنك،
بالنباعي تفيض ..
واتعنيت ..
ليله .. ويه الگمَر.
وصفولي عَنك،
كل مسامة تفيض مِنك عطر ..
يَلحِسنَك نَهَر
تنْزل بصدري،
ويَه النِفَس
وبدَمي،
غَصبَن تِنعجن
واشهگ ..
وأصّعدَك للسمه ..
بْحسرات ..
وبعَنَّة حِزنْ
حِنّ بويه حِنّ.
***
شفافَك، ولا گولن وَرد ..
عنَّابه ..
معگوده عَگد
تمتلي بگد،
ما تِنْمرِد
لا هي دَفو ..
ولا هي بَرِدْ
آني بْوَصفها راحْ أجنْ.
حِنّ بويه حِنّ.
***
سَكتاتك
تشَّكل خواطِر، بالگلب
ما لي عِرِف، بيهن گبلْ.
مَبروم بَرْم الخيط
يا رَيّان ..
ومخوصَر خَصر ..
لَف العگل
كل چلمة مِنك ..
نَبعَة البربين .. بالدلّال ..
ما تِحمل ثِگل
وصفولي عَنَك
وردة من قداح ..
ريش جناح،
زاهي بالسحر.
وصفولي عَنَّك
شال مِنك غيظ
بستان الوَرد
و النَرجِس الرايج سِكر.
حَنّي بفواريز ولَحن ..
حنّة حمامات السجن
حَنه إلي ..
وحنّه إلك ..
واللي يعجبَه خَلِ ايحنّ ..
حِن .. بويه حن.
***
آنه مِن اشوفَك
يمتلي الماضي الجَدِب،
زهرات بِيض مِن الوِفه
وروحي سواجي من الحنين ..
تْصير ..
وأتنبه وكِت بيها غِفه
يا محّجل ..
ان مَرّيتْ بيّه رْدود
أرِدْ رْدود .. للعشرين ..
مِن عُمْر الجِفَه
وأنصفْ عُمر منك،
فلا أنصَفْتَه بالهَجر ..
والهجِر مِنك ما كفه
حتى الهَجر يا روحي،
مِنك ما كفه
وگلبي على هَجرَك گام ايحن
حن وآنه حن
وانحَبِس وَنَّه ونمْتحِنْ
مَجبور،
أرخصَك عَلْ الدَمع
شًرط الدَمع يچوي الجِفن