نحن نحن الشرف الباذخ

دابي الكر شباب النيل

قوم قوك كفاك يا نايم

شوف شوف حداك يا لايم

مجدك ولى وشرفك ضل

امتى تزيد زيادة النيل

نحن نطارد العترة الفاردة

نحن نزود مشارع النيل

نحن برانا نحمي حمانا

نحن نموت ويحيى النيل

ما بندس ما نتوصى

نحن نكيل برانا نشيل

نحن الطينة ومطر العينة

نحن الوادي البرقه يشيل

نحن الصولة سيوف الدولة

نحن كنانة اسماعيل

بابه العالي وشرفه الغالي

كان لجدودنا ظله طليل

يا حكامنا جيبوا البينة

ولا انقرعوا كفوا الشبنة

ده ود عمي وده ضريب دمي

أنت شنو طفيلي دخليل

يا نزلانا امرقوا الذمة

كيف ينطاق هوان الامة

شالوا حقوقنا وزردوا حلوقنا

ديل عاوزين دمانا تسيل

من تبينا قمنا ربينا

ما اتفاسلنا قط في قليل

ما فيش تاتي مصري سوداني

نحن الكل أولاد النيل