نسيتك
و كان لابد يوم أنساك
و مهما الدنيا جارت بيك
حق الناس ح يستناك
ح تهرب وين و حولك نار
تهب في جهنم الحارقاك
و لو حاولت طيبة القلب
كان بدّلت شر جواك
و كنت عرفت معنى الخير
و كنت ارتحت من بلواك
***
و كيف نرجع نعاين ليك
و نطوي زمان من الأحزان
جنون إبليس على عينيك
و إنت تدرس الشيطان
فنون الغدر و البهتان
و كل أذية للإنسان
جحيم الآخرة ليك مكتوب
لظى و غليان حمم بركان
حرام نتمنّى إنت تتوب
كتير و الله فيك غفران
***
و ما أظن يوم بتتغير
و لا في طبعك
إنت الخير
و ما أظن يوم من الأيام
بتتبدل خطوط السير
بدونك تنتشي الساعات
و يفرح ليها حتى الطير
و حتى الليل و نجماتو
و كل صباح و كل عِصْيَر
و تبقى السكة نور في نور
و شكل الدنيا يصبح غير