العالم المجنون قلي اش تبي به

زحمة نباحٍ بين حوسة ضرابه

وكل رخيصٍ يدّعي جود وطيبة

والأرذل اللي شامتٍ خلف بابه

وين النخي يفزع لحاله عطيبة

ما هو بمثل اللي تسلّى العطابة

الشهم يعدل لو لناسٍ غريبة

ويحادد الظلّام لو من صحابه

يبان الأصلي من مطلّى خشيبة

وهرج الرخا يفضحه يوم الصلابة

واهي الجوارح كم هياطه يعيبه

والساطي يتقاوى على اهل الغلابة

والناس سلوتها بشبّ المصيبة

احد يتكوّى وهي تسلى عذابه

والله منظر ما يطاق الحكي به

يشيّب اللي توّ بادي شبابه

ولا من غدت هالناس حالة عجيبة

مسعورةٍ تلحق ورا ما تعابه

سر دربك مغنّي مطرّب قليبه

كفٍّ بجيب وكفّ يحمل شرابه

ترا النجيب اللي كفى الغير عيبه

في عالمه ماله بنبح الكلابة