يا سواد العيون وينك بسود الليالي

راح الليل وانا بالخلا ساهر الليل

مثل ذيبٍ عوا .. تايه على ربع خالي

في عجاج الفيافي عايش الوجد والويل

لا غفى طرفي الناعس ولا ارتاح بالي

كل ما انهد حيلي قمت اتصنع الحيل

اذكرك كل ما هبت رياح الشمالي

او طرى في مسارات الفلك طاري سهيل

اوقد النار واشعلها بحجم اشتعالي

واحطّب اضلاع صدري بعد ما اكيلها كيل

ليلي اشكي على الفنجان .. وش جرى لي

قهوتي مرة بعد ما بها نفحة الهيل

ليلي لا عد معي راحة ولا قلب سالي

وين عاد السلا والدمع في مدرب السيل

وين أبلقاك يا ريم الفلا؟ ضاق حالي

وين اوّجه مساري وامتطي صهوة الخيل