الديوان » السعودية » خالد الفيصل » يوم انا طالب

حلل القصيدة بواسطة BAYAN AI

يوم انا طالب هقيت اني عرفت

كل مافي الكون من سر الحياه

يوم انا طالب تحمّست ووعدت

اني اصلح ما تبيّن لي خطاه

يوم انا طالب على الغيمه رسَمت

ضحكة الدنيا على عذب الشفاه

يوم أنا طالب تخيّلت وحَلمت

اني البس من هَدب شمسي عباه

يوم انا طالب حَسبت اني وصلت

اثرني ما دست بالرجل الوطاه

وانتهى ربيع الاحلام وظهرت

اصدم الواقع ويصدمنى عطاه

ينجرح شوف العيون الى التفت

كن في حجر العيون اكبر قذاه

ان بغيت امشي لقيت انّي وقفت

وان رفعت الصوت ما جاني صداه

الحقايق فاجأتني ما بدأت

والزمان اسرع من اللي في رجاه

وانكسر غصن الخيال اللي زرعت

والتوى صدري على تسعين اه

لكن اني رغم هذا ما انهزمت

واستمريت ادعس الشوك بحفاه

كلما زادت مواجيعي صبرت

بين ثلج وبين جمرات الغضاه

ما غلبت الوقت لكن ما انغلبت

اعتصر نبعي من بطون الصفاه

كلها لعيون معشوق(ن) عشقت

ديرتي ديرة رفيعين الجباه

في ثراها غالي احبابي دفنت

وفي سماها اجمع الحلم وهواه

نبذة عن القصيدة

المساهمات


avatar

خالد الفيصل

السعودية

poet-khalid-al-faisal@

102

قصيدة

5795

متابعين

الأمير خالد بن فيصل بن عبد العزيز آل سعود، ولد سنة 1940م، في مكة المكرمة. وهوالابن الثالث من أبناء الملك فيصل بن عبد العزيز آل سعود ملك المملكة العربية السعودية الثالث، ...

المزيد عن خالد الفيصل

اقتراحات المتابعة

أضف شرح او معلومة