ابعد وسيبك م اللي خانوا ... واللي هنت ف يوم عليهم
 
مش هتخسر أي حاجة .. لو إيديك سابت إيديهم
 
لو تراجع ذكرياتك ... وافتكرت ف يوم آهاتك..
 
. مش هتبكي ف يوم عليهم
 
انت كنت بتدي عمرك ... للي خانوا واللي باعوا
 
واشتريت دايما خاطرهم .. وانت خاطرك هان عليهم
 
كنت بتخفف همومهم ...وبإيديك تمسح دموعهم .
 
.. وانت مش صعبان عليهم
 
ما تجيش ف يوم وتقول حبايبي... أو حتى كانوا ف يوم صحابي...
 
دول باعوك من غير مقابل... وانت ليه بتحن ليهم
 
اوعى تمسك في اللي سابك ... واللي يتمنى عذابك
 
واللي لما يطول غيابك .. يبقى فرصة حلوة ليهم
 
لو قالولك يوم يا سيدنا... انت كنت ف يوم حبيبنا ..
 
. والشيطان فرق ما بيننا.... ما تآمنش تاني ليهم
 
امسك بايدك ف الأصيل... واللي ما بينساش جميل
 
واللي الزمن لو جار عليك ... تلقى كل الحب فيهم
 
وانسى اللي عدا وللي كان ... وانسى اللي كنت عليه زمان .
.. وابدأ حكايتك من جديد ... وانسى تاني تبص ليهم