لدّي النظر يا اخت القمر

لدّي ترا ما به مفر

دلّاهةٍ حولك خطر

في الريح ترقاب وخبر

خذي من أشعاري وشاح

البرد أقبل باجتياح

يا كود تطويه الجراح

لو هدهدك طول النظر

تدرين وش قالوا زمان

قالوا الزمن ماله أمان

تبدّل سنينه ثوان

ويخيب ذاك اللي اغترر

الطير لا حان الأوان

هاجر ولا حده مكان

ما ينتظر حظ الزمان

يدور له عكس القدر

وجه الشبه بين الخريف

والخوف يا شبه الوليف

تجريح ما يظهر نزيف

هو بالتمهّل يحتكر

طال النظر ما بيننا

والوقت ما يسعف بنا

والوقت عدّى لا دنا

هذا الوعد حقّ الخبر

حرّايةٍ وش لك علي

قفّايةٍ وش لي بيدي

هذي الفيافي وهذا فَي

إما الهلاك.. إما القهر