يالله يا منش المزون المظلة

الواحد اللي له وصايف عظيمة 

متعالين وصفه عن الخلق كله 

معط العطايا المجزية والكريمة

والعبد يخطي والخطا عادةٍ له 

ويالله تكفينا كل ظلم وظليمة

وانك تطهرنا من الذنب كله 

في موقفٍ فيه الجوارح خصيمة 

والهرج يجلب للمخاليق علة

كثره يودِ النفس قرب الهزيمة 

والسكات ماهو عيب ولا مذلة

السكات حشمة للرجال الحشيمة

بعض الكلام يقال ماهو بمحله 

وكثر الكلام ينقص الرجل قيمة 

وكثر الكلام يجيب للرجل زلة 

ماكل هرجة يالسنافي سليمة 

والهرج لاجنّبك اسكت وخله 

مالك ومال المرضعة والفطيمة 

ولا تبحث اللي خافين في سجله 

شيّن خفاه الوقت احذر تقيمه 

لا تصير بين الناس غصة وعلّة 

وتقوم تنبش بالخفايا القديمة 

ماحد طلب منك السند والأدلة 

والناس ماهي عن اسلوبك غشيمة

الهرج عن كثره يكفيك قله

حفظك للسانك بالمجالس غنيمة